ياهيه اللتفت لي واسمع ادعـاي لـك ياهيـه..
ترا عـادك بتشبـع مـن البعـد وتواجـه
دعيتك بصـوت ٍ ياصلـك ليـه ماتوحيـه..
وانا اسمع ضلوعك من صدى الصوت لجّاجه
عليـك الفـؤاد اخلاجـه مصمّـخ ٍ راعيـه..
خـف الله فـي راعيـه ماتسمـع اخلاجـه
ترا العفو قـد جـاك اولـه واغتنـم تاليـه..
وترا الحلم بحر ٍ غيـر لا تامـن امواجـه
وترا الود ليل ٍ مظلم ٍ جيـت لـك ساريـه..
سراجه وصالـك والجفـى ينفـخ اسراجـه
وترا قصرنا اللي كم سنـه نجمـع ونبنيـه..
هوى العذل طيّـح بابـه العـود وسياجـه
لي أيام مـدري ويـن دارك ولا ادري ليـه..
وانا خابـر انـي بـاب شفـك ومزلاجـه
غيـاب ٍ بـلا سبّـه هجـاد ٍ بـلا تنبـيـه..
وجفا أغلا العرب نار ٍ على الكبـد وهّاجـه
نضج قلبي من البعـد وش حاجتـك تكويـه..
جفاك الجمر والصبر فـي بعـدك الصاجـه
طبـع حبـك بقلبـي والايـام مـا تمحيـه..
هـذا هجـرك يحـاول يموجـه ولا ماجـه
يموت الأمل لكـن ضنـون الغـلا تحييـه..
عـروق الوفـا فالـروح والقلـب وجّاجـه
خبرتوا حـد ٍ يبكـي علـى واحـد ٍ يبكيـه..
خبرتوا حـد ٍ مسجـون مايبغـي أفراجـه
احبـه ولا ابغضتـه علـى شـي ٍ إيسويـه..
ولا زالـت أرقـاب الرجـا فيـه منعاجـه
عسى منزل ٍ ضمه حقـوق الوسـم تسقيـه..
وتضحك له الدنيا وهـو يضحـك أحجاجـه
فقد خاطري شـي ٍ مـن الضيقـه امسلّيـه..
غدت روحي من النـاس والليـل هجّاجـه
اروح لمكـان ٍ خابـره ..خابـره ياتـيـه..
اسوق القدم صوبـه وهـي مالهـا حاجـه
مكـان ٍ نزيـه وأول مواجهـي لـه فـيـه..
وانـا خابـر ٍ مارجـل مثـلـه بـدواجـه
لعل وعسى مـا حدنـي للمجـي ..يدعيـه..
اشوفـه وانـا مـاودي اسبـب احـراجـه
يحب الجريح اخـر دروب اللقـاء ويجيـه..
وتحـب القـدم جيّـة مكـان اول مواجـه
للـشــاعــر: مــحــمــد بــن فــطــيــس